Uncategorized @iuq

Arviniliullutik piliriangujut nuqqaqtitausimaliqullugit iqqanaijarvimmi akiraqtuiniuvaktut

By January 28, 2021 No Comments

Ottawa, Ontario – January 28, 2021

Inuit Tapiriikkut Kanatami taanna pinasuarusiq atuqtillugu ilagijauqataulauqtut kanatalimaami uqallausiqaqtunut pijjutiqaqtigijaujut Nunaqaqqaarsimajunut katujjiqatigiinginnit, ilagijauqataullutik puraavinsinit ammalu aviktuqsimaniujunit gavamagijaujunit ammalu Canadami Gavamangat. Amisuingujunik uqallausiqaqatigiiktillugit ullunnut marruunnut, ilagijauqataujut uqallausiqalauqtut atusimajaminnik iqqanaijarvimmi akiraqtuiniuvaktunik aanniaqarnanngittulirijikkut iqqanaijarvingata iluani, ilinngaisimalirningit pigiallagutiqaqsimallutik iqqanaijarvimmi akiraqtuiniuvammijunut asingini kikkutuinnanut pijitsiraqtigijaujut iqqanaijarvinginnit.

Uqausiksaminik uqallausiqaliriaqsuni, Inuit Tapiriikkunnut Kanatami Angijuqqaangat Natan Obed uqalaurpuq iqqanaijarvimmi akiraqtugauvanningit Inuit aanniaqarnanngittulirijit iqqanaijarvinginni nuqqaqtitausimalirunnarniarmata asijjiisimalirniqtigut iqqanaijarviujuniillutik gavamagijaujut aulatsinirivaktanginnik aanniaqarnanngittulirijit pijitsirarutiksanginik, ilaqaqtillugit angijuullutik nutaanik piliriangulirumajunut ikajurniqaliqtitsilutik mikigligiarutiunajaqtunik inuusilirinirmi ammalu kiinaujaliurasuarutiullutik naliqqaunngitittivanniujunik atavviqaqtunut naammanngillariktunik aanniaqarnanngittulirijinit piliriniuvaktunut.

Inuit Tapiriikkut Kanatami nalunaiqsilauqtut 6-ngullutik pijjutiuluaqtunut piliriniulirunnaqtunik gavamatuqakkunnit nuqqaqtitausimaliqullugit iqqanaijarvinni akiraqtuiniuvaktunik Inunnik aanniaqarnanngittulirijikkunnit:

  1. Aaqqiksuiniq ammalu atuliqtitsiniq gavamatuqakkut Inuit Nunangannut maligaqutinik aaqqiisimalirutiuniarlutik kiinaujaliriniuvaktunut piliriqatigiinniulirajaqtunik Canadami gavamanganit ammalu Inunnit ammalu piliriangulirumajut turaangatitausimallutik ikajurutiksaullutik Inunut ikajurniqallariliqtillunigit Inunnik
  2. Ikajuqtuiniqtigut atuinnautitsisimanirmik aanniaqarnanngittulirinirmi pijitsirarutiksaujunik Inuktut Inuit Nunangata aviktuqsimaninginni nalunaimmariktuulluni inuktut uqallagviuqattarumajunik pitaqarningata, pilirijjutiuvanniaqtunut uqaqtausimajut Nnunaqaqqaaqsimajut Uqausinginnut Maligaqutiujut maliklugit
  3. Canadalimaami ajjigijaunnginninginnut tunngavviqaqtitaullutik tukisigiarviksaqutilirijjutinik aaqqiksuisimalirlutik gavamatuqakkut piliriqatigisimalugit Inuit ammalu province-ngujunit ammalu aviktuqsimaniujunit gavamagijaujut tukisigiarviksaquujut turaangallutik Inuit aanniaqaliqtailimaninginnut qanuillarinniujut pijausimaliqtitauqullugit qanuq ajjigiinnginniqarviuningit asinginnut Canadami takuksautitaujunnarniarmilutik
  4. Canadalimaami nunaqaqqaaqsimajut aanniaqarnanngittulirinirmut maligaqutinik aaqqiisimalirlutik ikajuqtuijjutiujunik Inuit nangminiq isumaliurutiliurunnarningita pitaqaliqtitsijiujunnarnirminnik aanniaqarnanngittulirinirmi pijitsirarutinik, ammalu inuit nautsiqtuijiujunnaqsilutik piliriniqarunnarnirminnut aaqqiksuinirnik, iqqanaijaqtitaarsimalirlutik, piutsiaqtunik maliktaugialiqutiksanik ammalu aulatsiniujunik aanniaqarnanngittulirinirmi pijitsirarutiksaujunik
  5. Gavamatuqakkut kiinaujanik aturunnarnirmut pijunnautiqaliqtitsilutik, taimautitaujunut uqaqtausimallutik aviktuqsimaningit 36-ngani Canadaup Piqujarjuaqutingini, gavamaujuit pitaqaqtitsisimaliqullugit naammaktunik qanuq ajjigiinnginniqarviujut quttingnirijaqarningita kikkutuinnanut pijitsirarutiksaujuni, ilaqaqtillugit aanniaqarnanngittulirinirmi pijitsirarutiksaujunik, Canadalimaami
  6. Ikajuqtuiniqalirlutik Inuit pijjutiqaqtitauniksanganik aanniaqarnanngittulirinirmi iqqanaijarviujuni, ilaqarlugit gavamatuqakkunnik piliriqatiqarniujunik anginiqsaujumik aturniqaqtutigut pilirijjusiqaliqtitsiqullugit Inunnik iqqanaijaqtitaarsimaliqpanniujunut ammalu pilimmaksaivanniujunut aanniaqsiurtilirinirmi iqqanaijaqtimmarigijaujunik