ᐋᑐᕙ, ᐋᓐᑎᐊᕆᐅ – ᔮᓄᐊᕆ 28, 2021
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑖᓐᓇ ᐱᓇᓱᐊᕈᓯᖅ ᐊᑐᖅᑎᓪᓗᒍ ᐃᓚᒋᔭᐅᖃᑕᐅᓚᐅᖅᑐᑦ ᑲᓇᑕᓕᒫᒥ ᐅᖃᓪᓚᐅᓯᖃᖅᑐᓄᑦ ᐱᔾᔪᑎᖃᖅᑎᒋᔭᐅᔪᑦ ᓄᓇᖃᖅᑳᕐᓯᒪᔪᓄᑦ ᑲᑐᔾᔨᖃᑎᒌᖏᓐᓂᑦ, ᐃᓚᒋᔭᐅᖃᑕᐅᓪᓗᑎᒃ ᐳᕌᕕᓐᓯᓂᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂᑦ ᒐᕙᒪᒋᔭᐅᔪᓂᑦ ᐊᒻᒪᓗ ᑲᓇᑕᒥ ᒐᕙᒪᖓᑦ. ᐊᒥᓱᐃᖑᔪᓂᒃ ᐅᖃᓪᓚᐅᓯᖃᖃᑎᒌᒃᑎᓪᓗᒋᑦ ᐅᓪᓗᓐᓄᑦ ᒪᕐᕉᓐᓄᑦ, ᐃᓚᒋᔭᐅᖃᑕᐅᔪᑦ ᐅᖃᓪᓚᐅᓯᖃᓚᐅᖅᑐᑦ ᐊᑐᓯᒪᔭᒥᓐᓂᒃ ᐃᖅᑲᓇᐃᔭᕐᕕᒻᒥ ᐊᑭᕋᖅᑐᐃᓂᐅᕙᒃᑐᓂᒃ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᑦ ᐃᖅᑲᓇᐃᔭᕐᕕᖓᑕ ᐃᓗᐊᓂ, ᐃᓕᖖᒐᐃᓯᒪᓕᕐᓂᖏᑦ ᐱᒋᐊᓪᓚᒍᑎᖃᖅᓯᒪᓪᓗᑎᒃ ᐃᖅᑲᓇᐃᔭᕐᕕᒻᒥ ᐊᑭᕋᖅᑐᐃᓂᐅᕙᒻᒥᔪᓄᑦ ᐊᓯᖏᓂ ᑭᒃᑯᑐᐃᓐᓇᓄᑦ ᐱᔨᑦᓯᕋᖅᑎᒋᔭᐅᔪᑦ ᐃᖅᑲᓇᐃᔭᕐᕕᖏᓐᓂᑦ.
ᐅᖃᐅᓯᒃᓴᒥᓂᒃ ᐅᖃᓪᓚᐅᓯᖃᓕᕆᐊᖅᓱᓂ, ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ ᐅᖃᓚᐅᕐᐳᖅ ᐃᖅᑲᓇᐃᔭᕐᕕᒻᒥ ᐊᑭᕋᖅᑐᒐᐅᕙᓐᓂᖏᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᔨᑦ ᐃᖅᑲᓇᐃᔭᕐᕕᖏᓐᓂ ᓄᖅᑲᖅᑎᑕᐅᓯᒪᓕᕈᓐᓇᕐᓂᐊᕐᒪᑕ ᐊᓯᔾᔩᓯᒪᓕᕐᓂᖅᑎᒍᑦ ᐃᖅᑲᓇᐃᔭᕐᕕᐅᔪᓃᓪᓗᑎᒃ ᒐᕙᒪᒋᔭᐅᔪᑦ ᐊᐅᓚᑦᓯᓂᕆᕙᒃᑕᖏᓐᓂᒃ ᐋᓐᓂᐊᖃᕐᓇᖖᒋᑦᑐᓕᕆᔨᑦ ᐱᔨᑦᓯᕋᕈᑎᒃᓴᖏᓂᒃ, ᐃᓚᖃᖅᑎᓪᓗᒋᑦ ᐊᖏᔫᓪᓗᑎᒃ ᓄᑖᓂᒃ ᐱᓕᕆᐊᖑᓕᕈᒪᔪᓄᑦ ᐃᑲᔪᕐᓂᖃᓕᖅᑎᑦᓯᓗᑎᒃ ᒥᑭᒡᓕᒋᐊᕈᑎᐅᓇᔭᖅᑐᓂᒃ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᐅᓪᓗᑎᒃ ᓇᓕᖅᑲᐅᖖᒋᑎᑦᑎᕙᓐᓂᐅᔪᓂᒃ ᐊᑕᕝᕕᖃᖅᑐᓄᑦ ᓈᒻᒪᖖᒋᓪᓚᕆᒃᑐᓂᒃ ᐋᓐᓂᐊᖃᕐᓇᖖᒋᑦᑐᓕᕆᔨᓂᑦ ᐱᓕᕆᓂᐅᕙᒃᑐᓄᑦ.
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓇᓗᓇᐃᖅᓯᓚᐅᖅᑐᑦ 6-ᖑᓪᓗᑎᒃ ᐱᔾᔪᑎᐅᓗᐊᖅᑐᓄᑦ ᐱᓕᕆᓂᐅᓕᕈᓐᓇᖅᑐᓂᒃ ᒐᕙᒪᑐᖃᒃᑯᓐᓂᑦ ᓄᖅᑲᖅᑎᑕᐅᓯᒪᓕᖁᓪᓗᒋᑦ ᐃᖅᑲᓇᐃᔭᕐᕕᓐᓂ ᐊᑭᕋᖅᑐᐃᓂᐅᕙᒃᑐᓂᒃ ᐃᓄᓐᓂᒃ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᓐᓂᑦ:
- ᐋᖅᑭᒃᓱᐃᓂᖅ ᐊᒻᒪᓗ ᐊᑐᓕᖅᑎᑦᓯᓂᖅ ᒐᕙᒪᑐᖃᒃᑯᑦ ᐃᓄᐃᑦ ᓄᓇᖓᓐᓄᑦ ᒪᓕᒐᖁᑎᓂᒃ ᐋᖅᑮᓯᒪᓕᕈᑎᐅᓂᐊᕐᓗᑎᒃ ᑮᓇᐅᔭᓕᕆᓂᐅᕙᒃᑐᓄᑦ ᐱᓕᕆᖃᑎᒌᓐᓂᐅᓕᕋᔭᖅᑐᓂᒃ ᑲᓇᑕᒥ ᒐᕙᒪᖓᓂᑦ ᐊᒻᒪᓗ ᐃᓄᓐᓂᑦ ᐊᒻᒪᓗ ᐱᓕᕆᐊᖑᓕᕈᒪᔪᑦ ᑐᕌᖓᑎᑕᐅᓯᒪᓪᓗᑎᒃ ᐃᑲᔪᕈᑎᒃᓴᐅᓪᓗᑎᒃ ᐃᓄᓄᑦ ᐃᑲᔪᕐᓂᖃᓪᓚᕆᓕᖅᑎᓪᓗᓂᒋᑦ ᐃᓄᓐᓂᒃ
- ᐃᑲᔪᖅᑐᐃᓂᖅᑎᒍᑦ ᐊᑐᐃᓐᓇᐅᑎᑦᓯᓯᒪᓂᕐᒥᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᔨᑦᓯᕋᕈᑎᒃᓴᐅᔪᓂᒃ ᐃᓄᒃᑐᑦ ᐃᓄᐃᑦ ᓄᓇᖓᑕ ᐊᕕᒃᑐᖅᓯᒪᓂᖏᓐᓂ ᓇᓗᓇᐃᒻᒪᕆᒃᑑᓪᓗᓂ ᐃᓄᒃᑐᑦ ᐅᖃᓪᓚᒡᕕᐅᖃᑦᑕᕈᒪᔪᓂᒃ ᐱᑕᖃᕐᓂᖓᑕ, ᐱᓕᕆᔾᔪᑎᐅᕙᓐᓂᐊᖅᑐᓄᑦ ᐅᖃᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᒪᓕᒐᖁᑎᐅᔪᑦ ᒪᓕᒃᓗᒋᑦ
- ᑲᓇᑕᓕᒫᒥ ᐊᔾᔨᒋᔭᐅᖖᒋᓐᓂᖏᓐᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᑐᑭᓯᒋᐊᕐᕕᒃᓴᖁᑎᓕᕆᔾᔪᑎᓂᒃ ᐋᖅᑭᒃᓱᐃᓯᒪᓕᕐᓗᑎᒃ ᒐᕙᒪᑐᖃᒃᑯᑦ ᐱᓕᕆᖃᑎᒋᓯᒪᓗᒋᑦ ᐃᓄᐃᑦ ᐊᒻᒪᓗ ᐳᕌᕕᓐᓯᐅᔪᓂᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂᑦ ᒐᕙᒪᒋᔭᐅᔪᑦ ᑐᑭᓯᒋᐊᕐᕕᒃᓴᖁᐅᔪᑦ ᑐᕌᖓᓪᓗᑎᒃ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᓂᖏᓐᓄᑦ ᖃᓄᐃᓪᓚᕆᓐᓂᐅᔪᑦ ᐱᔭᐅᓯᒪᓕᖅᑎᑕᐅᖁᓪᓗᒋᑦ ᖃᓄᖅ ᐊᔾᔨᒌᖖᒋᓐᓂᖃᕐᕕᐅᓂᖏᑦ ᐊᓯᖏᓐᓄᑦ ᑲᓇᑕᒥ ᑕᑯᒃᓴᐅᑎᑕᐅᔪᓐᓇᕐᓂᐊᕐᒥᓗᑎᒃ
- ᑲᓇᑕᓕᒫᒥ ᓄᓇᖃᖅᑳᖅᓯᒪᔪᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᒪᓕᒐᖁᑎᓂᒃ ᐋᖅᑮᓯᒪᓕᕐᓗᑎᒃ ᐃᑲᔪᖅᑐᐃᔾᔪᑎᐅᔪᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᑕ ᐱᑕᖃᓕᖅᑎᑦᓯᔨᐅᔪᓐᓇᕐᓂᕐᒥᓐᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᔨᑦᓯᕋᕈᑎᓂᒃ, ᐊᒻᒪᓗ ᐃᓄᐃᑦ ᓇᐅᑦᓯᖅᑐᐃᔨᐅᔪᓐᓇᖅᓯᓗᑎᒃ ᐱᓕᕆᓂᖃᕈᓐᓇᕐᓂᕐᒥᓐᓄᑦ ᐋᖅᑭᒃᓱᐃᓂᕐᓂᒃ, ᐃᖅᑲᓇᐃᔭᖅᑎᑖᕐᓯᒪᓕᕐᓗᑎᒃ, ᐱᐅᑦᓯᐊᖅᑐᓂᒃ ᒪᓕᒃᑕᐅᒋᐊᓕᖁᑎᒃᓴᓂᒃ ᐊᒻᒪᓗ ᐊᐅᓚᑦᓯᓂᐅᔪᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᔨᑦᓯᕋᕈᑎᒃᓴᐅᔪᓂᒃ
- ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑐᕈᓐᓇᕐᓂᕐᒧᑦ ᐱᔪᓐᓇᐅᑎᖃᓕᖅᑎᑦᓯᓗᑎᒃ, ᑕᐃᒪᐅᑎᑕᐅᔪᓄᑦ ᐅᖃᖅᑕᐅᓯᒪᓪᓗᑎᒃ ᐊᕕᒃᑐᖅᓯᒪᓂᖏᑦ 36-ᖓᓂ ᑲᓇᑕᐅᑉ ᐱᖁᔭᕐᔪᐊᖁᑎᖏᓂ, ᒐᕙᒪᐅᔪᐃᑦ ᐱᑕᖃᖅᑎᑦᓯᓯᒪᓕᖁᓪᓗᒋᑦ ᓈᒻᒪᒃᑐᓂᒃ ᖃᓄᖅ ᐊᔾᔨᒌᖖᒋᓐᓂᖃᕐᕕᐅᔪᑦ ᖁᑦᑎᖕᓂᕆᔭᖃᕐᓂᖏᑕ ᑭᒃᑯᑐᐃᓐᓇᓄᑦ ᐱᔨᑦᓯᕋᕈᑎᒃᓴᐅᔪᓂ, ᐃᓚᖃᖅᑎᓪᓗᒋᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᔨᑦᓯᕋᕈᑎᒃᓴᐅᔪᓂᒃ, ᑲᓇᑕᓕᒫᒥ
- ᐃᑲᔪᖅᑐᐃᓂᖃᓕᕐᓗᑎᒃ ᐃᓄᐃᑦ ᐱᔾᔪᑎᖃᖅᑎᑕᐅᓂᒃᓴᖓᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐃᖅᑲᓇᐃᔭᕐᕕᐅᔪᓂ, ᐃᓚᖃᕐᓗᒋᑦ ᒐᕙᒪᑐᖃᒃᑯᓐᓂᒃ ᐱᓕᕆᖃᑎᖃᕐᓂᐅᔪᓂᒃ ᐊᖏᓂᖅᓴᐅᔪᒥᒃ ᐊᑐᕐᓂᖃᖅᑐᑎᒍᑦ ᐱᓕᕆᔾᔪᓯᖃᓕᖅᑎᑦᓯᖁᓪᓗᒋᑦ ᐃᓄᓐᓂᒃ ᐃᖅᑲᓇᐃᔭᖅᑎᑖᕐᓯᒪᓕᖅᐸᓐᓂᐅᔪᓄᑦ ᐊᒻᒪᓗ ᐱᓕᒻᒪᒃᓴᐃᕙᓐᓂᐅᔪᓄᑦ ᐋᓐᓂᐊᖅᓯᐅᕐᑎᓕᕆᓂᕐᒥ ᐃᖅᑲᓇᐃᔭᖅᑎᒻᒪᕆᒋᔭᐅᔪᓂᒃ