ᓯᑦᑎᐱᕆ 24, 2020—ᐋᑐᕙ, ᐋᓐᑎᐊᕆᐅ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐃᑲᔪᖅᑐᒐᐅᓯᒪᓂᕐᒥᓐᓄᑦ ᑐᑭᓯᓯᒪᓕᓚᐅᖅᐳᑦ ᐱᓕᕆᐊᒃᓴᐅᓕᖅᑎᑕᐅᔪᓂᑦ ᐃᒃᐸᒃᓴᖅ ᑯᐃᓐ ᑭᒡᒐᖅᑐᖅᑎᖓᑕ ᑲᓇᑕᒥ ᐅᖃᓪᓚᐅᓯᕆᔭᖏᓂᑦ ᐊᒻᒪᓗ ᑲᓇᑕᒥᐅᓕᒫᓄᑦ ᑐᕌᖅᑎᑦᓱᓂᖏᑦ ᐅᖃᓪᓚᐅᓯᕆᔭᖏᓂᑦ ᑲᓇᑕᒥ ᐊᖏᔪᖅᑳᕐᔪᐊᑉ ᔭᔅᑎᓐ ᑐᕉᑑ ᑐᕌᖓᔪᓄᑦ ᑕᐃᒪᐅᖏᓐᓇᖅᓱᑎᒃ ᓯᕗᓪᓕᖅᐸᐅᑎᑕᒃᓴᖁᑎᒋᔭᐅᔪᓄᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᓐᓂᖏᓄᑦ ᑲᑎᒪᔨᕋᓛᖑᔪᓂᑦ (ICPC).

ᐱᓗᐊᖅᑐᒥᒃ ᓇᓗᓇᐃᖅᑕᐅᓯᒪᓕᓚᐅᖅᑐᑦ: 
  • ᐱᓕᕆᖃᑎᖃᓪᓚᑦᑖᕐᓂᖅ ᐃᓄᓐᓂᒃ ᐱᓕᕆᐊᖑᓕᖁᓪᓗᒋᑦ ᓂᕿᒋᓂᐊᖅᑕᓂᒃ ᐱᓯᒪᓕᕋᓱᒃᐸᓐᓂᕐᓄᑦ ᑲᓇᑕᒥ  
  • ᓱᒃᑲᓕᖅᑎᑦᑎᒋᐊᕐᓂᖅ ᐱᓕᕆᐊᖑᔪᓂᒃ ᐋᖅᑭᒃᓱᐃᖃᑎᒌᓐᓂᕐᓄᑦ ᓇᓗᓇᐃᔭᖅᑕᐅᓯᒪᓕᖅᑐᓄᑦ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ ᐃᓱᒪᒃᑯᑦ ᐋᓐᓂᐊᖃᓕᖁᔨᖖᒋᓐᓂᓕᕆᓂᕐᒥ ᐊᒻᒪᓗ ᖃᓄᐃᖖᒋᑦᓯᐊᕐᓂᓕᕆᓂᕐᒥ ᐸᕐᓇᐅᑎᓂᒃ  
  • ᓱᒃᑲᓕᕆᐊᖅᑎᑦᑎᓂᖅ ᐱᓕᕆᐊᖑᓕᖅᓯᒪᓂᕐᓂᒃ ᑲᓇᑕᒥ ᐱᓕᕆᐊᖑᓕᖁᔭᐅᓯᒪᓪᓗᑎᒃ ᐸᕐᓇᐅᑎᓂᒃ ᑭᐅᔾᔪᑎᒋᔭᐅᓯᒪᓪᓗᑎᒃ ᑲᓇᑕᓕᒫᒥ ᑐᑭᓯᐅᒪᓕᕆᐊᕐᓂᕐᒧᑦ ᓄᓇᖃᖅᑳᕐᓯᒪᔪᐃᑦ ᐊᕐᓇᐃᑦ

    ᓂᕕᐊᖅᓯᐊᓪᓗ ᐊᓯᐅᔨᔭᐅᓯᒪᓂᖏᓐᓄᑦ ᐊᒻᒪᓗ ᐃᓄᐊᖅᑕᐅᓯᒪᓂᖏᓐᓄᑦ ᐱᓕᕆᐊᓂ ᐊᒻᒪᓗ ᐃᖅᑲᖅᑐᐃᕝᕕᒃᑎᒍᑦ ᐃᑲᔪᖅᑐᒐᐅᓯᒪᓂᖃᓕᖁᓪᓗᒋᑦ
  • ᑲᔪᓯᑎᑕᐅᓂᖏᑦ ᐃᓗᐃᒃᑲᕈᖅᑎᑕᐅᒋᐊᕐᓂᖏᑕ ᐱᓕᕆᐊᖃᕐᕕᐅᔪᓂ ᐃᓚᑰᓂᖃᕐᕕᐅᔪᓄᑦ ᐃᓄᐃᑦ ᓄᓇᓕᓕᒫᖏᓐᓂ
  • ᓴᖅᑮᓯᒪᓕᕐᓂᖅ ᒪᓕᒐᕐᔪᐊᖑᓂᐊᖅᑐᒥᒃ ᐅᑭᐅᖓ 2020 ᐃᓱᓕᓚᐅᖅᑳᕐᑎᓐᓇᒍ ᐊᑐᓕᖅᑎᑕᐅᔾᔪᑎᐅᓂᐊᖅᑐᓂᒃ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖓᓐᓂᒃ ᓄᓇᖃᖅᑳᕐᓯᒪᔪᐃᑦ ᐱᔪᓐᓇᐅᑎᖃᕐᓂᖏᓐᓄᑦ
  • ᓯᕗᒻᒧᑎᑦᑎᓂᖅ ᐸᕐᓇᐅᑎᓕᐊᖑᓯᒪᔪᓂᒃ ᐅᖓᑖᓄᐊᖅᑎᑕᐅᓯᒪᔪᓂᒃ ᑲᓇᑕᒥ 2030-ᒧᑦ ᑎᑭᓪᓗᒍ ᓯᓚᓕᕆᓂᕐᒥ ᑐᕌᕐᕕᒃᓴᖁᑎᓕᐊᖑᓯᒪᔪᓂᑦ

ᓂᕆᐅᓐᓂᖃᑦᑎᐊᕐᒥᔪᒍᑦ ᓄᑖᖑᓪᓗᑎᒃ ᐱᓕᕆᐊᒃᓴᐅᓕᖅᓯᒪᔪᑦ ᐱᓕᕆᐊᖑᓕᖁᓪᓗᒋᑦ ᐱᓕᕆᔾᔪᑎᑎᒍᑦ ᓇᓕᖅᑲᐅᑎᑦᑎᖖᒋᓐᓂᐅᕙᒃᑐᓂᒃ ᑕᒪᐃᓂ ᐱᓕᕆᐊᖑᕙᓪᓕᐊᓂᐅᕙᒃᑐᓂ ᐱᕋᔭᒃᓯᒪᔪᓄᑦ ᐃᖅᑲᖅᑐᐃᕝᕕᓐᓂ ᑐᑭᖃᓕᖅᑎᑕᐅᖁᓪᓗᒋᑦ ᐊᖏᓂᖅᓴᐅᔪᑎᒍᑦ ᑕᒪᒃᑯᐊ ᐊᓯᔾᔨᖅᑕᐅᓯᒪᓕᕐᓂᖏᑕ ᐃᓄᓐᓄᑦ.

ᐃᓄᐃᑦ ᑐᖖᒐᓱᒃᑎᑦᑎᕗᑦ ᑲᓇᑕᒥ ᒐᕙᒪᒃᑯᑦ ᑲᔪᓯᑎᑦᑎᓯᒪᓂᖏᓂᒃ ᐱᓕᕆᐊᒃᓴᕆᔭᒥᓐᓂᒃ ᓴᐃᒻᒪᖃᑎᒌᒃᓯᒪᓕᕋᔭᕐᓂᕐᒧᑦ. ᓱᓕ ᐱᓕᕆᐊᖑᔭᕆᐊᖃᓪᓚᕆᓐᓂᖓ ᑕᒪᑐᒪ ᐊᓯᔾᔨᖅᓯᒪᖖᒋᒻᒪᑦ ᐅᓪᓗᒥᒧᑦ ᑕᐃᒪ 2015-ᖑᑎᓪᓗᒍ ᑖᒃᑯᐊ ᒐᕙᒪᒃᑯᑦ ᓯᕗᓪᓕᖅᐹᒥᒃ ᑯᐃᓐ ᑭᒡᒐᖅᑐᕐᑎᖓ ᐅᖃᓪᓚᐅᓯᖃᓚᐅᕐᓯᒪᓂᖓᓂᑦ, ᐊᒻᒪᓗ ᑭᖑᓪᓕᕐᒥ ᐅᑭᐅᓵᓚᐅᖅᑐᒥ ᐅᖃᓪᐅᓯᐅᓚᐅᕐᓂᖏᓂᑦ.

ᑲᓇᑕᒥᐅᑕᐅᓪᓗᑕ ᐊᑐᓕᖅᓯᒪᓕᕐᒥᒐᑦᑕ ᑐᒡᓕᕆᓕᖅᑕᖓᓂᒃ ᓄᕙᒡᔪᐊᕐᓇᖅ-19ᒥᒃ ᓯᓚᕐᔪᐊᓕᒫᒥ ᐋᓐᓂᐊᓕᕈᑎᐅᔪᓐᓇᖅᑐᒥᒃ, ᐊᒻᒪᓗ ᐊᒃᖢᐃᓕᕐᕕᒃᓴᒧᑦ ᑐᕌᕐᕕᒃᓴᖃᖅᑎᑕᐅᓯᒪᒻᒪᑕ ᐃᓄᐃᑦ ᐊᒻᒪᓗ ᑲᓇᑕᒥᐅᓕᒫᑦ ᑲᑎᓐᓂᖃᓕᖅᓯᒪᓗᑎᒃ ᐊᒻᒪᓗ ᐱᓕᕆᐊᖑᐃᓐᓇᕈᓐᓇᖅᓱᑎᒃ ᐋᖅᑭᒃᓱᐃᓯᒪᓕᕋᔭᕐᓂᖏᑕ ᒐᕙᒪᓕᕆᓂᕐᒥ ᐱᓕᕆᐊᖃᖅᑎᒋᔭᐅᔪᐃᑦ, ᒐᕙᒪᑐᖃᒃᑯᓐᓂ ᐃᖅᑲᓇᐃᔭᕐᕕᐅᔪᐃᑦ, ᐱᖃᓯᐅᑎᓪᓗᒋᑦ
ᐳᕌᕕᓐᓯᒋᔭᐅᔪᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᐃᑦ.

ᓄᕙᒡᔪᐊᕐᓇᖅ ᐃᖅᑭᓇᖅᑐᑎᑐᑦ ᓴᖅᑭᔮᕐᓂᖃᕐᒪᑦ ᐊᖏᔪᐊᓗᒻᒥᒃ ᐱᓕᕆᐊᒃᓴᕆᔭᐅᓕᖅᓯᒪᔪᑦ ᖁᓛᓃᑦᓱᓂ ᓲᕐᓗ. ᑕᒪᕐᒥᒃ ᐱᓕᕆᐊᖑᓕᖅᓯᒪᔪᑦ ᖃᓄᑎᒋ ᐊᒃᑐᐃᓯᒪᓕᕈᓐᓇᕐᓂᖓᑕ ᒥᑭᓪᓕᒋᐊᖅᑎᑕᐅᓯᒪᓕᖁᓪᓗᒋᑦ ᐊᒃᑐᖅᑕᐅᓴᕋᐃᑦᑑᓪᓗᑎᒃ ᐃᓅᖃᑎᒌᒃᑐᓄᑦ ᐱᒻᒪᕆᐅᓪᓗᑎᒃ ᐱᓕᕆᐊᖑᔭᕆᐊᖃᓪᓚᕆᒃᑐᓄᑦ ᐃᓚᐅᖃᑕᐅᕗᑦ ᐋᖅᑭᒃᓯᒪᓕᕈᓐᓇᖁᓪᓗᑕ ᐊᒻᒪᓗ ᐃᑲᔪᖃᑕᐅᓕᕈᓐᓇᖁᓪᓗᑕ ᐊᖏᓂᖅᓴᐅᓪᓗᑎᒃ ᑐᕌᕐᕕᒃᓴᖁᑎᐅᔪᓄᑦ ᑎᑭᓯᒪᓕᕆᐊᒧᑦ ᐃᓅᖃᑎᒌᖑᔪᓂ ᓇᓕᖅᑲᐅᑎᑕᐅᓯᒪᓕᖁᓪᓗᒋᑦ ᐃᓄᐃᑦ.