ᕕᑉᕈᐊᕆ 9, 2021 – Ottawa, Ontario

ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᖁᔭᓕᓚᐅᖅᐳᑦ ᑲᓇᑕᒥ ᒐᕙᒪᖓᓐᓂᒃ ᐃᓕᑕᑕᖅᓯᓯᒪᓂᖏᓐᓂᒃ ᐊᒻᒪᓗ ᑭᐅᓯᒪᓕᓚᐅᕐᓂᖏᓐᓂᒃ ᐃᓄᐃᑦ ᐱᓯᒪᓕᕆᐊᖃᖅᑕᖏᓂᒃ ᑐᒡᓕᕆᔭᖓᓂᒃ ᓄᕙᒡᔪᐊᕐᓇᖅ-19-ᒥᑦ ᓯᓚᕐᔪᐊᓕᒫᒥ ᐊᒃᑐᒐᐅᓯᒪᓕᕐᓂᖓᓐᓂᒃ, ᐃᓄᐃᑦ ᓄᓇᓕᒋᔭᖏᑦ ᐱᓗᐊᒻᒪᕆᒃᑐᒥᒃ ᐊᒃᑐᖅᑕᐅᓯᒪᓕᕈᑎᒋᓚᐅᖅᑕᖏᓐᓄᑦ.

ᓄᕕᐱᕆ 30, 2020-ᐅᑎᓪᓗᒍ, ᐱᖓᔪᕆᔭᐅᔪᑎᒍᑦ ᑮᓇᐅᔭᖁᑎᒃᓴᖅᑖᖑᔪᓐᓇᖅᑐᑦ ᒪᓕᒃᓗᒋᑦ ᒐᕙᒪᑐᖃᒃᑯᑦ ᓄᓇᖃᖅᑳᕐᓯᒪᔪᓂ ᓄᓇᓕᒋᔭᐅᔪᓄᑦ ᐃᑲᔪᕈᑎᒃᓴᐃᑦ ᑮᓇᐅᔭᑎᒍᑦ (ICSF) ᑐᓴᖅᑎᑦᓯᔾᔪᑎᐅᓚᐅᕐᒪᑕ ᐅᑭᐊᒃᓵᖓᓂ ᑮᓇᐅᔭᓕᐅᕈᑎᓄᑦ ᑎᑎᕋᖅᑕᐅᓯᒪᔪᓂᑦ, ᑎᑭᓯᒪᓪᓗᑎᒃ $380-ᒥᓕᐊᓐᑖᓚᓄᑦ. ᑖᒃᑯᐊ ᑮᓇᐅᔭᖁᑎᒃᓴᐅᔪᑦ ᐊᕕᒃᑐᒐᐅᓯᒪᓕᕐᑐᑦ ᐊᔾᔨᒌᖖᒋᐅᕐᓂᖃᕐᓂᖏᓐᓄᑦ ᒪᓕᒃᑎᑕᐅᓪᓗᑎᒃ, $22.5-ᒥᓕᐊᓐᑖᓚᐅᔪᑦ ᓴᓂᕐᕙᖅᑕᐅᓯᒪᓕᖅᓱᑎᒃ ᐃᓄᓐᓄᑦ. ᑖᒃᑯᐊ ᑮᓇᐅᔭᖁᑎᒃᓴᐃᑦ ᓴᓂᕐᕙᖅᑕᐅᓯᒪᔪᑦ ᐃᓄᐃᑦ ᐊᕕᒃᑐᖅᓯᒪᓂᖏᓐᓄᑦ ᒪᓕᒃᑎᑕᐅᓪᓗᑎᒃ ᐅᖃᖅᑕᐅᓯᒪᔪᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᕕᒃᑐᖅᓯᒪᔪᓄᑦ ᓴᓂᕐᕙᖅᑕᐅᓯᒪᓂᐊᕐᓂᖏᓐᓄᑦ ᑮᓇᐅᔭᖁᑎᒃᓴᐃᑦ ᐋᖅᑭᒃᑕᐅᓯᒪᓂᖏᑦ.

ᑖᒃᑯᐊ ᒪᓕᒃᑎᑕᐅᓯᒪᕗᑦ $45-ᒥᓕᐊᓐᑖᓚᓄᑦ ᓴᓂᕐᕙᖅᑕᐅᓯᒪᓕᓚᐅᖅᑐᓄᑦ ᓯᕗᓪᓕᖅᐹᒥᒃ ᓴᓂᕐᕙᐃᓯᒪᓕᕐᓂᐅᓚᐅᖅᑐᓄᑦ ICSF-ᓂᑦ ᒫᔾᔨ 2020-ᒥ ᐊᒻᒪᓗ $22.5-ᒥᓕᐊᓐᑖᓚᓂᑦ ᓴᓂᕐᕙᖅᑕᐅᓚᐅᖅᑐᓂᑦ ᑐᒡᓕᕆᔭᖓᓂ ᐅᒡᒍᑎ 2020-ᐅᑎᓪᓗᒍ. ᐊᕕᒃᑐᖅᓯᒪᓂᕐᓂ ᑲᑐᔾᔨᖃᑎᒌᖑᔪᑦ ᐊᑐᖅᓯᒪᓕᓚᐅᕐᒪᑕ ᑮᓇᐅᔭᖁᑎᒃᓴᖅᑖᒥᓐᓂᒃ ᐃᑲᔪᕈᑎᒋᓪᓗᒋᑦ ᐊᔾᔨᒌᖖᒋᐅᖅᑑᓪᓗᑎᒃ ᓯᓚᕐᔪᐊᓕᒫᒥ ᓄᕙᒡᔪᐊᕐᓇᖃᓕᖅᓯᒪᓂᕐᒥᑦ ᑐᕌᖓᓪᓗᑎᒃ ᐃᑲᔪᓕᕈᑎᒃᓴᐅᓪᓗᑎᒃ ᐱᓕᕆᐊᖑᔪᓄᑦ ᐃᓄᓐᓄᑦ ᓄᓇᖃᖅᑐᓄᑦ ᓄᓇᓕᕆᓂᕐᒥᑦ ᐊᕕᒃᑐᖅᓯᒪᓂᕆᔭᐅᔪᑦ ᐃᓗᐊᓂ ᐊᒻᒪᓗ ᓯᓚᑖᓂᕐᒥᐅᖑᔪᓄᑦ. ᑕᒪᒃᑯᐊ ᐃᓚᖃᖅᑎᑕᐅᓚᐅᖅᐳᑦ ᐃᓄᒃᑐᑦ ᐃᓕᓐᓂᐊᖅᑎᑦᓯᔾᔪᑎᒃᓴᓕᐊᖑᓯᒪᔪᓄᑦ, ᐃᑲᔪᕈᑎᒃᓴᓄᑦ ᐃᒪᓕᕆᔨᒃᑯᓐᓄᑦ ᐊᒻᒪᓗ ᐃᑎᕈᓕᕆᔨᒃᑯᓐᓄᑦ ᐃᖅᑲᓇᐃᔭᕐᕕᓐᓂᒃ, ᐊᖏᒡᓕᒋᐊᖅᑎᑕᐅᓂᖏᓐᓄᑦ ᖃᐅᔨᓴᐃᕝᕕᐅᔪᓂ ᐱᓕᕆᓂᖃᕈᓐᓇᕐᓂᐅᔪᓄᑦ, ᐅᖁᖅᓴᐅᑎᓄᑦ ᑮᓇᐅᔭᑎᒍᑦ ᐃᑲᔪᕈᑎᒃᓴᓄᑦ ᐊᒻᒪᓗ ᓂᕆᒋᔭᒃᓴᓄᑦ ᐱᓕᕆᐊᖑᔪᓄᑦ ᐊᒻᒪᓗ ᐊᖑᓇᓱᐊᖅᑏᑦ ᐃᑲᔫᓯᐊᖅᑖᕈᑎᒃᓴᖏᓄᑦ ᐱᓕᕆᐊᓄᑦ, ᐊᓯᖏᓄᓪᓗ ᐱᓕᕆᓂᐅᓕᖅᓯᒪᔪᓄᑦ.