ᓱᓇᐅᖕᒪᑕ?
ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑏᑦ ᓯᕗᓪᓕᖅᐸᐅᓪᓗᑎᒃ ᓇᐅᒃᑰᕐᕕᒃᓴᓕᐊᖑᓯᒪᕗᑦ ᐱᓕᕆᐊᖃᓕᕐᓂᕐᒥ ᐋᖅᑭᒃᓱᒐᐅᓯᒪᓕᖅᑐᓂᑦ ᐱᐅᓯᒋᐊᖅᑎᑦᑎᓯᒪᓕᕆᐊᕐᓂᕐᒥ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᖏᓐᓄᑦ ᐃᓄᐃᑦ ᓄᓇᖓᓐᓂ, ᑲᓇᑕᒥᐅᑦ ᐃᓄᖏᑕ ᓄᓇᒋᔭᑐᖃᖓᓐᓂ.
ᓱᓇᐅᖕᒪᑦ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᖕᓇᖖᒋᓐᓂᖅ?
ᐃᓄᒃ ᑭᓇᑐᐃᓐᓇᖅ ᓂᕿᒋᔭᒃᓴᒥᓂᒃ ᐱᓯᒪᓕᖃᑦᑕᕈᓐᓇᖖᒋᑦᑑᕙᒻᒪᑦ ᐊᑐᐃᓐᓇᐅᕝᕕᐅᖖᒋᒃᑯᓂ ᓈᒻᒪᒃᑐᓂᒃ, ᖃᓄᐃᖖᒋᑦᑎᐊᖅᑐᓂᒃ ᓂᕿᒋᔭᕆᐊᖅ ᐊᒻᒪᓗ ᓂᕿᑦᑎᐊᕙᓐᓂᒃ ᓂᕿᒋᕙᒋᐊᖃᖅᑕᒥᓐᓂᒃ ᐊᓐᓇᐅᒪᔾᔪᑎᒋᓂᐊᕐᓗᒋᑦ ᐊᒻᒪᓗ ᓂᕿᒋᔪᒪᕙᒃᑕᒥᓐᓂᒃ ᐃᓅᓯᕐᒥᓐᓂ ᖃᓄᐃᓕᐅᕈᓘᔭᕈᓐᓇᕐᓂᐊᕋᒥᒃ ᐊᒻᒪᓗ ᐋᓐᓂᐊᖃᓕᖅᑕᐃᓕᒪᓂᕆᓪᓗᒋᑦ. ᑕᒪᓐᓇ ᑐᑭᖃᕈᓐᓇᕐᒥᔪᖅ ᓂᐅᕕᕈᑎᒃᓴᒥᓐᓂᒃ ᓈᒻᒪᐅᑎᔪᓐᓇᖅᐸᖖᒋᓐᓂᖏᓐᓄᑦ ᓂᕿᑦᑎᐊᕙᓐᓂᒃ ᓂᕿᖃᕈᑎᒃᓴᒥᓐᓂᒃ, ᓂᕆᓐᓇᐅᑎᓪᓗᒍ ᓂᕆᖖᒋᖃᑦᑕᕐᓂᒥᓐᓂᒃ ᐅᕝᕙᓘᓐᓃᑦ ᐅᓪᓗᓄᑦ ᐊᒥᓱᓄᑦ ᓂᕆᔭᒃᓴᖃᖖᒋᑉᐸᓐᓂᕐᒥᓐᓂᑦ ᓂᕆᖃᑦᑕᖖᒋᓐᓂᕐᒥᓐᓄᑦ. ᐃᓄᖕᓄᑦ, ᑕᒪᓐᓇ ᑐᑭᖃᕈᓐᓇᕐᒥᔪᖅ ᐊᑐᐃᓐᓇᐅᕝᕕᐅᖖᒋᓂᕐᒥᒃ ᐃᓄᐃᑦ ᓂᕿᒋᕙᒃᑕᖏᓐᓄᑦ ᓄᓇᒥᖖᒑᖅᑐᓂᒃ ᓂᕿᒋᔭᐅᓂᖅᐹᖑᕙᒃᑐᓂᑦ ᐱᐅᓯᑐᖃᕆᔭᕗᑦ ᐊᒻᒪᓗ ᐃᓅᓯᕗᑦ ᒪᓕᒃᓗᒋᑦ.
ᓱᓇᑎᒍᑦ ᑖᒃᑯᐊ ᐸᕐᓇᐅᑏᑦ ᐊᔾᔨᒋᔭᐅᖖᒋᑉᐸᑦ?
ᐸᕐᓇᐅᑏᑦ ᑐᖖᒐᕝᕕᖃᖅᑎᑕᐅᒻᒪᑕ ᐃᓄᐃᑦ ᓂᕆᐅᓐᓂᖃᕐᕕᒋᔭᖏᓐᓄᑦ ᑳᓕᖅᓯᒪᖃᑦᑕᕐᓂᖅ ᓂᕆᔭᒃᓴᖃᖖᒋᒧᑦ ᐃᓱᓕᑎᑕᐅᓯᒪᓕᖁᓪᓗᒍ ᐊᒻᒪᓗ ᓯᕗᒻᒧᒃᑎᑕᐅᓯᒪᓕᖁᓪᓗᒋᑦ ᓂᕿᓕᕆᕙᓐᓂᕐᓄᑦ ᐊᐅᓚᑦᓯᔨᐅᔪᓐᓇᕐᓂᖅ.
ᐸᕐᓇᐅᑏᑦ ᓇᓗᓇᐃᔭᐃᓯᒪᕗᑦ ᐱᓕᕆᐊᖑᔪᓂᒃ ᐱᒋᐊᖅᑎᑦᓯᔾᔪᑎᒃᓴᓂᒃ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᕐᒧᑦ ᐊᒻᒪᓗ ᑲᔪᓰᓐᓇᖅᑎᑕᐅᔪᓐᓇᖅᓱᑎᒃ ᓂᕿᓕᕆᓂᕐᒥ ᐱᓕᕆᔾᔪᑎᒃᓴᓂᒃ ᐃᓄᐃᑦ ᓄᓇᖓᓐᓂ ᐃᒪᓐᓇᐃᑎᑕᐅᔪᓂᒃ:
- ᑕᑯᒃᓴᐅᑎᑦᓯᓪᓗᑎᒃ ᐃᓄᐃᑦ ᐃᓅᖃᑎᒌᒃᑐᑦ ᐊᑐᕐᓂᖃᖅᑎᑕᖏᓂᒃ.
- ᐃᑲᔪᖅᑐᐃᓂᖃᖅᑐᑦ ᐃᓄᐃᑦ ᖃᓄᐃᖖᒋᑦᓯᐊᕆᐊᖃᕐᓂᖏᓐᓂᒃ.
- ᐱᑕᖃᓕᖅᑎᑦᑎᓯᒪᔪᓂᒃ ᐃᓄᓐᓄᑦ ᐊᑐᐃᓐᓇᐅᑎᑕᐅᓪᓗᑎᒃ ᐊᑭᑐᓗᐊᖖᒋᑦᑐᓂᒃ, ᓂᕿᑦᑎᐊᕙᓐᓂᒃ, ᖃᓄᐃᖖᒋᑦᑐᓂᒃ ᓂᕿᒋᔭᕆᐊᖅ ᓂᕿᓂᒃ, ᐊᒻᒪᓗ ᐱᐅᓯᑐᖃᒥᓐᓂ ᓂᕿᒋᔭᐅᖔᕈᒪᕙᒃᑐᓄᑦ ᓂᕿᓂᒃ.
ᐸᕐᓇᐅᑏᑦ ᐱᒋᐊᖅᑎᑦᓯᓯᒪᕗᑦ ᐋᖅᑮᓯᒪᓕᕐᓂᒃᑯᑦ ᑲᓇᑕᓕᒫᒥ ᑐᑭᓯᐅᒪᓂᕐᓂᒃ ᒪᑯᓄᖓ ᐱᔾᔪᑎᖃᖅᑐᓂᒃ:
- ᖁᑦᑎᓗᐊᒻᒪᕆᒃᑑᖏᓐᓇᕐᓂᖏᑕ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓂᓄᑦ.
- ᐃᓚᒋᔭᐅᖃᑕᐅᓪᓗᑎᒃ ᐱᔾᔪᑎᐅᔪᓄᑦ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᓐᓂ.
- ᐋᖅᑭᒃᓱᖅᑕᐅᓯᒪᔪᑎᒍᑦ ᐃᓄᖕᓂᑦ ᐱᓕᕆᐊᖑᓕᖅᑎᑕᐅᓯᒪᓪᓗᑎᒃ ᐋᖅᑮᒋᐊᕈᑎᒃᓴᐃᑦ ᐱᓕᕆᐊᖑᓯᒪᓕᖁᓪᓗᒋᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᐃᓄᐃᑦ ᓄᓇᖓᓐᓂ.
ᖃᓄᐃᒻᒪᑦ ᑕᐃᒪᓐᓇᐃᑦᑐᓂᒃ ᐸᕐᓇᐅᑎᓂᒃ ᐱᓯᒪᓕᕆᐊᖃᖅᐸᑦ?
- ᑲᓇᑕᒥᐅᑦ ᐃᓄᐃᑦ ᖁᑦᑎᖕᓂᖅᐸᐅᔪᒥᒃ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᑦ ᖁᑦᑎᖕᓂᖃᕐᓂᖅᓴᐅᕗᑦ ᐊᓯᖏᓐᓂᑦ ᓄᓇᖃᖅᑳᕐᓯᒪᔪᓂ ᐃᓅᖃᑎᒌᖑᔪᓂᑦ ᓴᓇᓕᕐᕕᒃᓴᖃᐅᖅᑑᓪᓗᑎᒃ ᓄᓇᕐᔪᐊᕆᔭᐅᔪᓂᑦ.
- ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᑦ ᐃᓚᒋᔭᐅᖃᑕᐅᕗᑦ ᐊᑯᓂᐅᓂᖅᐹᖑᓪᓗᑎᒃ ᑭᒃᑯᑐᐃᓐᓇᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᑐᐊᕕᐅᕐᓇᖅᓯᓯᒪᓂᖃᕐᓂᖏᓐᓂ ᑲᓇᑕᒥᐅᓂ ᐃᓅᖃᑎᒌᒃᑐᓂ.
- ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᓇᓗᓇᐃᒻᒪᕆᒃᑐᒥᒃ ᓈᒻᒪᖖᒋᑦᑐᑎᒍᑦ ᐋᓐᓂᐊᖃᓕᖅᑕᐃᓕᒪᕙᓐᓂᐅᔪᑦ ᐊᒃᑐᖅᑕᐅᓯᒪᓕᕈᓐᓇᕐᒪᑕ.
- ᒫᓐᓇᐅᔪᖅ ᒐᕙᒪᑐᖃᒃᑯᑦ ᒪᓕᒐᖁᑎᖃᖖᒋᒻᒪᑕ ᐃᓱᓕᑎᑕᐅᓯᒪᓕᖁᓪᓗᒍ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᑦ.
- ᑮᓇᐅᔭᓕᐅᕐᓂᖏᑦ ᐊᑦᓯᒃᑑᑎᓪᓗᒋᑦ ᐃᓄᐃᑦ ᑮᓇᐅᔭᓕᐅᕈᑎᖏᑦ ᐊᖏᓂᖅᐸᐅᔪᒥᒃ ᐊᑐᖅᑕᐅᕙᒻᒪᑕ ᖃᐅᑕᒫᑦ ᓂᕿᒋᔭᒃᓴᐅᓂᐊᖅᑐᓄᑦ ᐊᒻᒪᓗ ᐃᒡᓗᖃᕈᑎᒃᓴᐅᓂᐊᖅᑐᓄᑦ.
- ᐃᓄᐃᑦ ᓄᓇᓕᒋᔭᖏᓐᓂᕐᒥᐅᑦ ᖁᑦᑎᒃᑐᒻᒪᕆᖕᒥᒃ ᐊᓐᓇᐅᒪᓇᓱᐊᕈᑎᒃᓴᖏᓐᓄᑦ ᐊᑭᓕᖅᑐᐃᕙᒋᐊᖃᕐᐸᒃᑐᑦ ᐊᒻᒪᓗ ᐊᒃᖢᓗᐊᕐᓂᐅᔪᑦ ᖁᑦᑎᖕᓂᕆᔭᖏᑎᒍᑦ..
- ᖁᑦᑎᒃᑐᐊᓘᓂᖏᑕ ᐃᓄᐃᑦ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᓐᓂ ᖁᑦᑎᖕᓂᕆᔭᐅᔪᑦ ᐱᐅᓯᒋᐊᖅᑎᑕᐅᔪᓐᓇᕐᓂᐊᕐᒪᑕ ᑭᓯᐊᓂ ᐱᓕᕆᖃᑎᖃᓕᕐᓂᖅᑎᒍᑦ ᐃᓄᖕᓂᒃ ᓯᕗᒻᒧᒋᐊᖅᑎᑕᐅᓯᒪᓕᕈᓐᓇᕐᓂᐊᖅᐸᑕ ᐃᓄᖕᓂᑦ ᐱᓕᕆᐊᖑᓕᖅᑎᑕᐅᓯᒪᓪᓗᑎᒃ ᐋᖅᑭᒋᐊᕈᑎᒃᓴᐅᓂᐊᖅᑐᓂᒃ.
ᖃᓄᖅ ᐋᖅᑭᒋᐊᖅᑕᐅᓯᒪᓕᕈᓐᓇᖅᐸᑦ?
ᓴᖖᒋᒃᑎᒋᐊᖅᓯᒪᓕᕐᓗᒋᑦ ᐃᓄᐃᑦ ᓄᓇᖓᓐᓂ ᓂᕿᓕᕆᓂᕐᒥ ᐱᓕᕆᔾᔪᑎᐅᔪᑦ ᐱᓕᕆᐊᖃᖃᑎᒌᖕᓂᖅᑎᒍᑦ ᐃᓄᖕᓂᒃ ᒪᑯᓂᖓ:
ᐊᖏᒡᓕᒋᐊᖅᑎᓯᒪᓕᕐᓗᒋᑦ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᑦ ᐱᔾᔪᑎᖃᖅᑐᑦ ᐃᓄᐃᑦ ᓄᓇᖓᓐᓂ ᓂᕿᓕᕆᓂᕐᒥ ᐱᓕᕆᔾᔪᑎᓄᑦ.
- ᑐᑭᓯᐅᒪᓕᕐᓗᒋᑦ ᖃᓄᖅ ᑐᑭᖃᖅᑎᑕᐅᒻᒪᖔᑕ ᓂᕿᓕᕆᓂᕐᒥ ᐊᐅᓚᑦᓯᔨᐅᔪᓐᓇᕐᓂᖅ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖅ ᐃᓄᖕᓄᑦ.
- ᐋᖅᑭᒃᓱᐃᓯᒪᓕᕐᓗᑎᒃ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᐋᖅᑭᒋᐊᕈᑎᒃᓴᓕᐊᖑᓯᒪᔪᓂᒃ ᐊᑐᕐᓗᒋᑦ ᐊᔾᔨᒌᖖᒋᑦᑑᓂᖏᓐᓄᑦ ᑐᖖᒐᕝᕕᖃᖅᑎᑕᐅᓯᒪᔪᓂᒃ ᐃᓄᐃᑦ ᓄᓇᖓᓐᓂ ᒪᓕᒐᖁᑎᓂᒃ ᑕᑯᓐᓇᕈᓯᐅᕙᓐᓂᐊᖅᑐᓄᑦ.
- ᐊᑐᕐᓂᖃᖅᑎᓯᒪᓗᑎᒃ ᐃᓄᐃᑦ ᓂᕿᒋᕙᒃᑕᖏᓂᒃ ᐊᖑᓇᓱᐊᖅᐸᓐᓂᕐᒥᑦ ᑮᓇᐅᔭᓕᐅᕈᑎᖃᖅᐸᓐᓂᐅᔪᑦ ᐊᒻᒪᓗ ᐆᒪᔪᓕᕆᓂᕐᒥ ᐊᐅᓚᑦᓯᓂᕐᒧᑦ ᐃᓱᒪᓕᐅᕈᑎᓕᐅᖅᐸᓐᓂᕐᓄᑦ.
- ᖃᐅᔨᓴᐃᓂᐅᕙᒃᑐᑦ ᐊᒻᒪᓗ ᖃᐅᔨᒋᐊᕐᓂᐅᕙᕐᑐᑦ ᓂᕿᓕᕆᓂᕐᒥ ᐱᓕᕆᔾᔪᑎᓂᒃ ᐊᒻᒪᓗ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᐅᔪᑦ ᑐᖖᒐᕝᕕᖃᖅᑎᑕᐅᓕᖅᑎᓪᓗᒋᑦ ᐃᓄᐃᑦ ᓯᕗᓪᓕᖅᐸᐅᑎᑕᐅᖁᔭᖏᓐᓄᑦ ᐊᒻᒪᓗ ᓯᕗᓕᖅᑎᐅᓂᖏᓐᓄᑦ ᐃᓄᐃᑦ.
ᒥᑭᒡᓕᒋᐊᖅᑎᑕᐅᓯᒪᓕᕐᓗᑎᒃ ᐃᓄᐃᑦ ᐊᒃᖢᓗᐊᖅᑑᓂᖏᓂᒃ ᐊᒻᒪᓗ ᐊᑐᓕᖅᑎᑦᓯᓗᑎᒃ ᐊᑭᒋᔭᐅᕙᒃᑐᓄᑦ ᐱᓕᕆᓂᐅᔪᑦ.
- ᖃᐅᔨᒋᐊᖅᓯᒪᓕᕐᓗᒋᑦ ᓈᒻᒪᒃᑑᒐᓗᐊᕐᒪᖔᑕ ᐃᓅᓯᓕᕆᔨᒃᑯᑎᒍᑦ ᐃᑲᔪᖅᑕᐅᔾᔪᑎᑖᖑᕙᒃᑐᓄᑦ ᐱᓕᕆᐊᖑᔪᑦ ᐊᒻᒪᓗ ᐋᖅᑭᒃᓱᐃᓯᒪᓕᕐᓗᑎᒃ ᐊᒃᖢᓗᐊᕐᓂᐅᔪᓂᒃ ᒥᑭᒡᓕᒋᐊᕈᑎᒃᓴᐅᓪᓗᑎᒃ ᐱᓕᕆᓂᐅᓕᕋᔭᖅᑐᓂᒃ.
- ᐱᓕᕆᐊᕆᓗᒋᑦ ᐊᓐᓇᐅᒪᔾᔪᑎᒃᓴᐃᑦ ᐊᑭᑐᓗᐊᖅᑑᓂᖏᑦ ᐊᒻᒪᓗ ᓂᕿᒋᔭᒃᓴᐃᑦ ᐃᓄᐃᑦ ᓄᓇᖓᓐᓂ ᐱᓕᕆᓂᖅᑎᒍᑦ ᐊᑐᓕᖅᑎᑦᑎᓯᒪᓪᓗᑎᒃ ᑮᓇᐅᔭᑎᒍᑦ ᓇᖕᒥᓂᖅ ᐊᔪᖖᒋᓕᕈᑎᐅᔪᓐᓇᖅᑐᓂᒃ.
ᐱᑕᖃᓕᖅᑎᑦᓯᓗᑎᒃ ᐃᑲᔪᕈᑎᒃᓴᓂᒃ ᐃᓚᒌᖑᔪᓄᑦ ᐊᒻᒪᓗ ᓱᕈᓯᕐᓄᑦ, ᑐᕌᖓᑎᑕᐅᓯᒪᓪᓗᑎᒃ ᐊᒃᑐᖅᑕᐅᓴᕋᐃᓐᓂᖅᐸᐅᔪᓄᑦ.
- ᐱᐅᓯᒋᐊᖅᑎᓯᒪᓕᕐᓗᒋᑦ ᐃᓕᓐᓂᐊᓕᓵᖅᑐᓄᑦ ᐃᓕᓐᓂᐊᕈᑎᒃᓴᑦ ᐊᒻᒪᓗ ᐱᓕᕆᓂᐅᕙᒃᑐᑦ ᐃᓕᓐᓂᐊᕐᕕᖕᓂ ᓂᕆᔭᒃᓴᖃᖅᑎᑦᓯᕙᓐᓂᕐᒧᑦ ᐱᓕᕆᐊᖑᔪᑎᒍᑦ.
- ᓇᓗᓇᐃᔭᖅᓯᒪᓕᕐᓗᒋᑦ ᐊᖏᓂᖅᐸᐅᔪᒥᒃ ᐊᒃᑐᖅᑕᐅᓴᕋᐃᑦᑐᑦ ᐊᒻᒪᓗ ᐋᖅᑭᒃᓱᐃᓯᒪᓕᕐᓗᒋᑦ ᐱᑦᓯᐊᖅᑑᓗᑎᒃ ᐊᑐᐃᓐᓇᐅᑎᑦᑎᓯᒪᓕᕐᓗᒋᑦ ᓂᕿᑦᑎᐊᕙᓐᓂᒃ ᓂᕿᖃᖃᑦᑕᖅᑎᑕᐅᓕᖁᓪᓗᒋᑦ ᑕᒪᕐᒥᒃ ᐃᓄᐃᑦ.
- ᐱᓕᕆᐊᕆᓯᒪᓕᕐᓗᒋᑦ ᐊᑯᓃᖖᒋᑦᑐᒧᑦ ᐊᒻᒪᓗ ᐊᑯᓃᖅᑐᒧᑦ ᐊᒃᑐᐃᓯᒪᓕᕐᓂᐅᔪᑦ ᐱᓗᐊᒻᒪᕆᒃᑐᒥᒃ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᐃᓄᖕᓂ.
ᑮᓇᐅᔭᓂᒃ ᕿᑐᕐᖏᐅᓕᖅᑎᑦᓯᓂᖅ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕐᓂᕐᒧᑦ ᐱᓕᕆᐊᓄᑦ ᐊᒻᒪᓗ ᓴᐳᔾᔨᒋᐊᕈᑎᐅᕙᒃᑐᓄᑦ.
- ᑕᐅᑦᑐᕆᓂᐊᖅᑕᖏᓂᒃ ᐋᖅᑭᒃᓱᐃᓯᒪᓕᕐᓗᑎᒃ ᐃᑲᔪᕐᓂᖃᕋᔭᖅᖢᑎᒃ ᒪᓕᒐᓕᕆᓂᕐᒥ ᐱᓕᕆᐊᓂᒃ, ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐱᓕᕆᐊᓂᒃ, ᐊᒻᒪᓗ ᓴᐳᔾᔨᒋᐊᕈᑎᐅᕙᒃᑐᓂᒃ ᖃᐅᔨᒋᐊᖅᑕᐅᔪᓐᓇᕐᓂᐊᕐᓗᑎᒃ ᖃᓄᐃᓕᖓᓕᕐᓂᖏᓐᓄᑦ.
- ᖃᐅᔨᓴᖅᑕᐅᓯᒪᓕᕐᓗᑎᒃ ᓄᓇᓕᐅᔪᒥ ᓂᕿᓕᕆᕙᓐᓂᕐᒧᑦ ᐊᓯᖏᑎᒍᑦ ᐱᓕᕆᓂᐅᕙᒍᓐᓇᖅᑐᑦ ᒪᓕᒃᑎᑕᐅᓯᒪᓗᑎᒃ ᐃᓄᐃᑦ ᐱᓯᒪᓕᕆᐊᖃᖅᑕᖏᓐᓄᑦ ᐊᒻᒪᓗ ᐊᑐᕐᓂᖃᖅᑎᑕᖏᓐᓄᑦ.
- ᐃᓕᑦᓯᓯᒪᓕᕐᕕᒋᓗᒋᑦ ᐊᒻᒪᓗ ᐱᕈᖅᓯᒪᓕᕐᕕᒋᒋᐊᕐᓗᒋᑦ ᐱᓕᕆᐊᖑᔪᑦ ᓈᒻᒪᒃᑐᑎᒍᑦ ᐊᒃᑐᐃᓯᒪᓂᖃᖅᑐᑦ ᐃᓄᐃᑦ ᓂᕿᓂᒃ ᓂᐅᕕᐊᖃᖃᑦᑕᕈᓐᓇᕐᓂᕐᒧᑦ ᐱᔪᖕᓇᐅᑎᐅᔪᓂᑦ.
- ᐱᑕᖃᓕᖅᑎᑦᓯᓗᑎᒃ ᓂᕿᑦᑎᐊᕙᓐᓂᒃ ᐱᓯᒪᓕᕈᑎᒃᓴᓂᒃ ᐃᑲᔪᕈᑎᐅᓪᓚᕆᓕᕋᔭᖅᑐᓄᑦ ᓇᓗᓇᐃᖅᑕᐅᓯᒪᓪᓗᑎᒃ ᐃᑲᔪᕈᑎᒃᓴᑎᒍᑦ ᐊᒃᑐᖅᑕᐅᓴᕋᐃᑦᑑᓪᓗᑎᒃ ᐃᓄᐃᑦ ᐃᓚᒌᓄᑦ.
ᐃᑲᔪᖅᑐᐃᓂᖅ ᐊᖑᓇᓱᐊᖅᐸᓐᓂᐅᔪᓂᒃ ᐊᒻᒪᓗ ᐊᒥᖅᑲᕈᑎᖃᖃᑦᑕᕐᓂᕐᓂ ᐱᓕᕆᔾᔪᑎᒃᓴᐃᑦ.
- ᐃᑲᔪᖅᑐᐃᓯᒪᓕᕐᓗᑎᒃ ᓄᓇᓕᐅᔪᒥ ᐊᒻᒪᓗ ᐊᕕᒃᑐᖅᓯᒪᓂᕐᒥ ᓂᕿᓕᕆᓂᐅᕙᒃᑐᓂᒃ ᐊᒻᒪᓗ ᓯᐊᒻᒪᒃᑎᕆᕙᓪᓕᐊᓂᕐᒥ ᐱᓕᕆᐊᖃᖅᑎᐅᔪᓂᒃ.
- ᐱᓕᕆᓂᖃᖃᑕᐅᓪᓚᕆᒃᑐᑦ ᓂᕿᓕᕆᓂᕐᒥ ᐱᓕᕆᔾᔪᑎᒋᔭᐅᔪᓄᑦ ᑮᓇᐅᔭᓕᐅᕐᓂᖏᑎᒍᑦ ᐊᓐᓇᐅᒪᔾᔪᑎᒃᓴᓕᐅᕈᓐᓇᓕᖅᑎᓪᓗᒋᑦ
- ᑮᓇᐅᔭᓂᒃ ᕿᑐᕐᖏᐅᓕᖅᑎᑦᓯᓂᒃᑯᑦ ᐱᓕᕆᐊᓄᑦ ᐱᓕᕆᔾᔪᑎᐅᕙᒃᑐᓂᒃ ᐋᖅᑭᒃᓱᐃᕙᓐᓂᖏᓐᓄᑦ ᐃᓄᐃᑦ ᐊᖑᓇᓱᐊᕐᓂᕐᒧᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐊᔪᖖᒋᓐᓂᕆᔭᖏᓂᒃ.
ᐱᓕᕆᐊᖑᓕᕐᓗᑎᒃ ᐃᓄᐃᑦ ᓂᕿᓕᕆᓂᕐᒥ ᐱᓕᕆᔾᔪᑎᖏᓐᓄᑦ ᐋᖅᑭᒃᑕᐅᓯᒪᔪᓂ ᑮᓇᐅᔭᑎᒍᑦ ᖄᖏᐅᑎᓯᒪᔾᔪᑎᒋᔭᖏᑦ.
- ᐱᓕᕆᐊᖑᓕᕐᓗᑎᒃ ᖃᓄᐃᓕᖓᓕᕈᓐᓇᖅᑑᓪᓗᑎᒃ ᓂᕿᑕᖃᖅᑎᑦᓯᕙᒍᑎᐅᔪᑦ ᐊᖏᒡᓕᕙᓪᓕᐊᔪᒥᒃ ᐊᒃᑕᖅᑕᐅᕙᓪᓕᐊᓂᖃᖅᑐᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ.
- ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᕐᓗᑎᒃ ᓄᓇᓕᐅᔪᒥ ᓂᕿᓄᑦ ᓯᕐᓗᐊᖅᑖᕈᑎᒃᓴᓂᒃ ᐊᒻᒪᓗ ᓂᕿᓕᕆᕝᕕᒃᓴᓂᒃ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᓄᓇᓕᐅᔪᒥ ᓂᕿᓕᕆᓂᐅᕙᒃᑐᑦ ᐊᒻᒪᓗ ᑐᐊᕕᐅᕐᓇᖅᑐᖃᓕᖅᐸᑦ ᓂᕿᑎᒍᑦ ᐃᑲᔪᕈᑎᒃᓴᐅᓂᐊᕐᓗᑎᒃ ᐱᓕᕆᓂᐅᔪᓄᑦ.
- ᐃᓕᑕᕆᔭᐅᓯᒪᓕᕐᓗᑎᒃ ᐅᑭᐅᖅᑕᖅᑐᒥ ᖃᖓᑕᓲᖅᑎᒍᑦ ᐱᔨᑦᓯᕋᕈᑎᐅᕙᒃᑐᑦ ᑕᐃᒪᐅᔭᕆᐊᖃᓪᓚᕆᖕᓂᖏᑕ ᐃᓄᐃᑦ ᓂᕿᓂᒃ ᐱᓯᒪᓕᖅᑎᑦᑎᓂᐅᕙᒃᑐᓂ.
ᐸᕐᓇᐅᑏᑦ
ᑖᒃᑯᐊ ᒥᒃᓵᓄᑦ ᓇᓗᓇᐃᕆᐊᕈᑎᓂᒃ ᑐᓴᖅᑎᑕᐅᓯᒪᓕᕈᒪᔪᑦ, ᖃᐅᔨᒋᐊᕈᓐᓇᖅᐳᑦ ᐃᓗᐃᒃᑲᐅᓪᓗᒋᑦ ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑎᓕᐊᖑᓯᒪᔪᑦ ᐊᑐᐃᓐᓇᐅᑎᑕᐅᓪᓗᑎᒃ ᖃᓪᓗᓈᑎᑐᑦ, ᐃᓄᒃᑐᑦ ᖃᓕᐅᔮᖅᐸᐃᖅᑐᑦ, ᐃᓄᒃᑐᑦ ᖃᓂᐅᔮᖅᐸᐃᖅᑐᑦ, ᐊᒻᒪᓗ ᕖᕖᑎᑑᓕᖅᓯᒪᔪᑦ ᑎᑎᕋᖅᑕᐅᓯᒪᓂᖏᑦ.
ᐸᕐᓇᐅᑏᑦ ᐊᒥᓱᐃᓕᖓᔫᓪᓗᑎᒃ ᑎᑎᕋᖅᑕᐅᓯᒪᕗᑦ ᐃᓗᓕᖃᖅᓱᑎᒃ ᐱᔾᔪᑎᒋᔭᐅᔪᓂᒃ ᐊᒻᒪᓗ ᐱᓕᕆᐊᖑᓯᒪᔪᓄᑦ ᐃᓄᐃᑦ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕐᓂᕐᓄᑦ ᐱᓕᕆᐊᖑᔪᓂᒃ ᐃᓄᐃᑦ ᓄᓇᖓᓐᓂ ᐊᒻᒪᓗ ᓇᓗᓇᐃᔭᐃᓯᒪᓪᓗᑎᒃ ᖃᓂᒋᔭᖓᓂ 24-ᖑᔪᑦ ᐱᓕᕆᐊᖑᓕᖅᓯᒪᔪᑦ ᐋᖅᑭᒃᓱᐊᖑᓯᒪᓪᓗᑎᒃ ᐃᓄᖕᓂᑦ ᐃᓄᐃᑦ ᐱᔾᔪᑎᒋᓯᒪᓪᓗᒋᑦ.
