ᐅᒡᒍᑎ 16, 2021 – ᐋᑐᕙ, ᐋᓐᑎᐊᕆᐅ
ᐊᑭᑐᓗᐊᖖᒋᑦᑐᓂᒃ, ᖁᓚᕐᓇᖅᑑᓇᑎᒃᓗ ᓱᒃᑲᓕᑦᓯᐊᖅᑐᓂᒃ ᖃᕆᑕᐅᔭᒃᑰᕈᑎᑕᖃᓕᕆᐊᖃᕐᓂᖓ ᐃᓄᐃᑦ ᓄᓇᖓᓐᓂ ᐱᑕᖃᓕᕆᐊᖃᓪᓚᕆᖕᒪᑦ ᐃᓄᐃᑦ ᐃᓚᒋᔭᐅᖃᑕᐅᔪᓐᓇᓕᖁᓪᓗᒋᑦ ᑮᓇᐅᔭᓕᐅᕈᑎᒋᔭᐅᕙᒃᑐᓄᑦ ᐃᓅᖃᑎᒌᒋᔭᐅᒻᒥᔪᓂᑦ ᐊᒻᒪᓗ ᐱᕙᓪᓕᐊᑎᑦᓯᓂᐅᕙᒃᑐᓄᑦ ᑮᓇᐅᔭᓕᐅᕈᑎᐅᕙᒃᓱᑎᒃ. ᑭᓯᐊᓂᓗ, ᐊᑐᐃᓐᓇᐅᑎᑕᐅᓂᖏᑕ ᓱᒃᑲᓕᑦᓯᐊᖅᑐᓂᒃ ᖃᕆᑕᐅᔭᒃᑰᕈᑎᑦ ᐃᓄᐃᑦ ᓄᓇᓕᖏᓐᓂ ᑭᖑᕙᖅᓯᒪᓪᓗᐊᖅᑎᑕᐅᒻᒪᑕ ᐃᓱᒪᒋᓗᒋᑦ ᐊᓯᖏᓂ ᑲᓇᑕᒥ ᐊᑐᐃᓐᓇᐅᑎᑕᐅᓯᒪᓂᖏᓐᓄᑦ ᐃᓚᒋᖃᓯᐅᑎᓪᓗᖏᑦ ᐊᓯᖏᑦ ᐅᑭᐅᖅᑕᖅᑐᒥ ᐊᐅᓚᑦᓯᓂᖃᕐᕕᐅᖅᒥᔪᓂ.
ᐃᓄᐃᑦ ᑕᐱᕇᑦ ᑲᓇᑕᒥ ᓄᑕᐅᓂᖅᐹᖑᓪᓗᑎᒃ ᖃᐅᔨᓴᐃᓂᕐᒧᑦ ᑐᓴᐅᒪᓕᖅᑎᑦᓯᒋᐊᕈᑎᖏᑦ, ‘ᐅᐊᔭᒨᖅᑐᑎᒎᖅᑐᓂ ᐊᕕᓐᓂᖅᓯᒪᔾᔪᑎᐅᔪᑦ: ᖃᕆᑕᐅᔭᑎᒍᑦ ᐊᑦᑕᑕᖅᓯᒪᓕᖃᑦᑕᕈᓐᓇᕐᓃᑦ ᐃᓄᐃᑦ ᓄᓇᖓᓐᓂ‘, ᑐᕌᖓᑎᑕᐅᓯᒪᕗᑦ ᐅᖄᓚᐅᑎᑎᒍᑦ ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ ᐊᒻᒪᓗ ᓈᓚᐅᑎᒃᑰᕈᑎᑎᒍᑦ ᐊᑦᑕᑕᖅᓯᒪᓕᖃᑦᑕᕈᑎᓄᑦ ᐃᓄᐃᑦ ᓄᓇᖓᓐᓂ. ᐱᑕᖃᖅᑎᑦᓯᓯᒪᕗᑦ ᐱᔾᔪᑎᐅᓯᒪᔪᓂᒃ ᖃᕆᑕᐅᔭᑎᒎᕈᑎᒃᓴᓂᒃ ᐊᑐᐃᓐᓇᐅᑎᑕᐅᔪᓕᕆᓂᕐᓄᑦ ᐃᓄᐃᑦ ᓄᓇᖓᓐᓂ, ᐊᒻᒪᓗ ᐱᓕᕆᕝᕕᒃᓴᓂᒃ ᐱᑕᖃᓕᕆᐊᖃᕐᓂᖓᓄᑦ ᐃᓚᑰᓂᖃᕐᕕᐅᓕᖅᓯᒪᔪᑦ ᐅᐊᔭᒨᖅᑐᑎᒍᑦ ᐊᕕᓐᓂᖅᓯᒪᔾᔪᑎᐅᔪᓄᑦ ᐃᓄᐃᑦ ᓄᓇᖓᓐᓂᕐᒥᐅᑦ ᐊᒻᒪᓗ ᑲᓇᑕᒥᐅᖑᖃᑎᒋᔭᖏᑕ. ᓴᖅᑭᑕᐅᓯᒪᓕᑐᐃᓐᓇᕆᐊᖃᖅᑐᑦ ᓯᓚᕐᔪᐊᕐᒥᐅᓕᒫᓂᑦ ᐱᓇᓱᐊᕈᓯᐅᕙᒃᑐᑎᒍᑦ ᓇᓗᓇᐃᔭᖅᑕᐅᓯᒪᕗᑦ ᐊᒻᒪᓗ ᖃᓄᖅ ᐊᔾᔨᒌᖖᒋᓐᓂᖃᕐᓂᐅᔪᓂᒃ ᑲᓇᑕᒥ ᐅᓪᓗᒥᐅᔪᖅ ᐊᑦᑕᑕᖅᓯᒪᓕᕈᓐᓇᖅᑎᑕᐅᓯᒪᔪᓄᑦ ᐸᕐᓇᐅᑎᓂ.
ᐊᖏᔪᒻᒪᕆᖕᒥᒃ ᑐᖖᒐᕝᕕᖃᖃᑦᑕᓕᖅᓯᒪᓃᑦ ᖃᕆᑕᐅᔭᒃᑰᕈᑎᑎᒍᑦ ᐱᓕᕆᐊᖃᖅᐸᓐᓂᕐᓂ ᐃᓕᓐᓂᐊᓂᓕᕆᓂᕐᒥ ᐊᒻᒪᓗ ᐃᖅᑲᓇᐃᔮᓄᑦ ᓄᕙᒡᔪᐊᕐᓇᒥᒃ ᐊᑐᓕᖅᓯᒪᑎᓪᓗᑕ ᓯᓚᕐᔪᐊᓕᒫᒥ ᐃᓄᐃᑦ ᐱᓕᕆᔾᔪᑎᖃᕈᑎᒃᓴᖏᓂᒃ ᐱᑕᖃᕐᕕᐅᓯᒪᓂᖏᑦ ᐊᒥᒐᓗᐊᖃᑦᑕᕐᒪᑕ ᐊᖏᕐᕋᖅᓯᒪᔭᕆᐊᖃᖅᑎᑦᑎᓂᐅᔪᑦ ᐊᑐᓕᖅᑎᑕᐅᓯᒪᕙᒃᑎᓪᓗᒋᑦ ᐊᒻᒪᓗ ᐃᖏᕐᕋᔪᓐᓇᕐᓂᖏᑦ ᑭᒡᓕᖃᓕᖅᑎᑕᐅᓯᒪᑎᓪᓗᒋᑦ. ᓈᓚᐅᑎᒃᑰᕈᑎᑎᒍᑦ ᐊᑦᑕᑕᖅᓯᒪᓕᕈᓐᓇᕐᓂᐅᔪᑦ ᐃᑲᔪᖅᑐᐃᓯᒪᕗᑦ ᐃᓕᓐᓂᐊᖅᓯᒪᑦᓯᐊᓕᕆᐊᖃᕐᓂᕐᓂᒃ, ᐊᐅᓚᔾᔭᐃᒋᐊᖅᑎᑦᑎᓯᒪᓪᓗᑎᒃ ᑮᓇᐅᔭᓕᐅᕋᓱᒍᑎᐅᕙᒃᑐᓂᒃ, ᐊᒻᒪᓗ ᐱᐅᓯᒋᐊᖅᑎᑦᓯᓇᔭᕐᖢᑎᒃ ᐱᔨᑦᓯᕋᕈᑎᒃᓴᐅᔪᑦ ᐊᑐᐃᓐᓇᐅᑎᑕᐅᕙᓐᓂᖏᓐᓄᑦ ᓲᕐᓗ ᐋᓐᓂᐊᖅᓯᐅᕐᑎᓕᕆᓂᕐᓂ ᐊᐳᒃᑐᖅᓯᒪᓂᐅᔪᒥ ᐱᔨᑦᓯᕋᕈᑎᒃᓴᐅᔪᑦ ᐊᔪᕐᓇᖅᑑᕙᒃᑎᓪᓗᒋᑦ. ᐃᓄᐃᑦ ᓄᓇᖓᓂᕐᒥᐅᑦ ᐱᑕᖃᕐᕕᐅᖖᒋᒻᒪᑕ ᐱᓕᕆᐊᖃᕈᑎᒃᓴᓂᒃ ᓈᓚᐅᑎᒃᑰᕈᑎᒃᓴᑦ ᐱᑕᖃᓕᖅᑎᑕᐅᖁᓪᓗᒋᑦ ᐃᓄᖁᑎᑦᑎᓐᓄᑦ.
“ᐱᑕᖃᓕᖅᑎᑦᓯᓂᖅ ᖁᓚᕐᓇᖖᒋᑦᑐᓂᒃ, ᐊᑭᑐᓗᐊᕋᑎᒃᓗ ᖃᕆᑕᐅᔭᒃᑰᕈᑎᒃᓴᓂᒃ ᐃᓄᐃᑦ ᓄᓇᖓᓂᕐᒥᐅᓄᑦ ᐅᓪᓗᒥᐅᓕᖅᑐᒥ ᓄᓇᕐᔪᐊᕆᔭᑦᑎᓐᓄᑦ ᐱᕈᖅᑎᑦᑎᒋᐊᕈᑎᐅᓗᓂ ᐱᓕᕆᐊᒃᓴᐅᓕᕈᓐᓇᕐᒪᑦ. ᖃᕆᑕᐅᔭᒃᑰᕈᑏᑦ ᑕᐃᒪᐅᔭᕆᐊᖃᓪᓚᕆᒃᑑᓪᓗᑎᒃ ᐱᔨᑦᓯᕋᕈᑎᒃᓴᐅᒻᒪᑕ, ᐊᒻᒪᓗ ᐱᑕᖃᓕᖅᑎᑕᐅᔭᕆᐊᖃᖅᓱᑎᒃ ᐃᓄᐃᑦ ᓯᕗᒻᒧᒋᐊᖅᓯᒪᓕᕈᑎᒃᓴᖏᓂᒃ ᓇᐅᒃᑯᓕᒫᑲᓴᒃ ᐃᓅᓯᕐᒥᓐᓃᑦᑐᓄᑦ, ᑭᓯᐊᓂᓗ ᐱᓗᐊᖅᑐᒥᒃ ᐃᓕᓐᓂᐊᕐᓂᓕᕆᓂᕐᓂ, ᖃᐅᔨᓴᐃᓂᐅᕙᒃᑐᓂ, ᑕᐃᒪᐅᑎᑕᐅᔭᕆᐊᖃᓪᓚᕆᒃᓱᑎᒃ ᐱᔨᑦᓯᕋᕈᑎᒃᓴᓂ, ᐊᒻᒪᓗ ᑮᓇᐅᔭᓕᐅᕋᓱᒍᑎᐅᕙᒃᑐᓂ ᐅᖃᕐᓂᐊᕐᓗᒋᑦ ᐊᒥᓲᖖᒋᑦᑑᒐᓗᐊᑦ ᓱᓇᐅᓂᖏᓐᓄᑦ, ᐅᖃᖅᓱᓂ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ. “ᐊᑐᐃᓐᓇᐅᕝᕕᐅᓂᖅ ᖁᓚᕐᓇᖖᒋᑦᑐᓂᒃ ᖃᕆᑕᐅᔭᒃᑰᕈᑎᓂᒃ ᐃᓗᐃᒃᑲᕈᖅᑎᑦᓯᒋᐊᕈᑎᐅᓇᔭᕐᒪᑕ ᓄᓇᖖᒍᐊᑎᒍᑦ ᐅᖓᓯᒃᑰᓂᖏᑕ ᐃᓄᐃᑦ ᓄᓇᖓᓂᕐᒥᐅᑦ ᐊᒻᒪᓗ ᖃᓪᓗᓈᑦ ᓄᓇᖓᓂᕐᒥᐅᑦ ᑲᓇᑕᒥ, ᐊᒻᒪᓗ ᐃᓄᐃᑦ ᓄᓇᑐᖃᑦᑎᓐᓂᕐᒥᐅᑦ ᐃᓚᒋᔭᐅᖃᑕᐅᓕᕐᓗᑎᒃ ᑲᓇᑕᒥᐅᖑᖃᑎᒥᓐᓄᑦ.”